Txatxilipurdi Elkartetik gaur egungo garaietan kokatuta, gure eragite esparrutik, honela irudikatzen dugu ikasturtea.

Txatxilipurdik, 2020-2021 ikasturteari ekin dio, motxila ilusioz, sormenez eta  gogoz betea.

Txatxilipurdik amesten eta eraldatzen jarraitu nahi du; haurrekin kaleak hartzen, nerabeekin prozesu parte hartzaileak gauzatzen, familiekin harremanak eraikitzen. Naturaz bustitzen, euskaraz bizitzen eta euskaraz gozatzen. Eta posible da, noski baietz!

Sentsazio horiek, seguru asko, gutariko askok izan ditugu. Eta are gehiago, sentsazio horiek gorpuztu egin direla eta esperientzia eraldatzaileetan bilakatu direla. Izan ere, praktika on mordoxka ematen ari dira Euskal Herriko txoko ezberdinetan. Ohikotzat jo eta zurruntzat genituen egiteko molde asko irauli egin dira edo birsortu egin dira. Kaleetan, eskoletan, etxeetan, herrietan …  agertu diren behar berriei (eta ez horren berriei) modu kolektiboan antolatuta, erantzuna eman zaie. Gainera, hemen geratzeko sortuak izan dira molde berri horiek edo behintzat aztarna utziko dute.

Txatxilipurdik argi ikusten du: denok osasuntsu egoteko elkar zaindu beharko dugu eta elkarrekin aritu beharko dugu. Eta herriko haurrak, nerabeak, familiak nahiz herriko eragile ezberdinak ikasturte honetan ere, gertu izan nahi ditugu. Momentu oso aproposa da horretarako, elkarrekin ekiteko, elkarrekin aritzeko, herri hezitzaileago baten bidean.

Hezkuntza ez formaletik, aisialdi hezitzailearen eremutik, asko egin daiteke. Gozamenezko, plazerezko eta askatasunez beteriko testuinguruan, pertsona bakoitzaren beharrak jaso daitezke. Elkar ulertu, elkarrekin konektatu eta ekar zaindu daiteke. Elkarrekin hazi eta elkarrekin hezi daiteke.

Txatxilipurdi kontziente da ere egun bizi dugun errealitatean ziurgabetasun egoera ezberdinak suertatu ahal direla eta honek beldurrak sortu ditzakeela. Hori hala, beldurrak entzuteko eta ahal den neurrian horiei erantzuteko prestutasun osoa duela adierazi nahi du Elkarteak.

Erronkaz beteriko errealitate batean gaude. Erronkak aldiz, aukerez josiak. Eta, Txatxilipurdik, aukera horiei profesionaltasunez, sormenez, ilusioz eta gogoz heldu nahi die! Ikasturtea martxan da eta, kalean nahiz Udal gaztetxoko eta ludoteketan ikusiko dugu elkar!